1st fitting @ janny wong

今日係我期待左成個月既 1st fitting 呀 !!! 同行既當然有未來老公啦 , 緊係要有佢 o係 到啦 , 佢要負責俾錢架麻 .... 所以點可以無左佢呢 , 呵呵 ~~~ 仲有既就係同我品味差唔多既 nephy , 仲有就係岩岩由美國返黎既 jennifer .....

約左 janny 2:00pm - 4:00pm 試衫 .... janny 除左俾我試我之前 mark 低左既衫 , 佢仲俾我試左好多其他款既衫 , 當然仲有佢 d 新衫啦 , 真係多到都唔記得試左幾多件啦 !!!

試衫試到 d 衫名都唔記得曬 !!! 試到咁多靚衫真係好開心呢 !!!

我 join 既 package 係 1婚紗 + 3 晚裝 + 1伴娘裙 ... 其實原本係得 2 晚裝架 , 不過未來老公覺得 d 男裝麻麻地 , 所以我就轉埋晚裝 !!!

好啦 , 首先講下婚紗先啦 !!! (講明先呀 , 有 d 名真係唔記得左架 !!! 所以只係打我記得既 ~~)

1.) 英國公主小天使第 10 版 : 聽個名都覺得好可愛啦 , 有我最鍾意既水晶袖 , 同埋後面有個蝴蝶結 , 70" 拖尾 ... 呢個長度既拖尾係我最鍾意既 ~~

2.) 英國公主第 12 版 : 上身超級多水晶 , 奪目閃耀 .... 一行出去時 , 佢地三個都講 : 嘩 , 好閃呀 !!! 我就係要呢種感覺 , 不過可惜唔係咁鍾意下半身 !!!

跟住 janny 叫我不如試下花邊領既 , 所以就試左 , 連佢地都話我著花邊領好睇 .... 其實我真係好想試下件 100" 長拖尾架 , 不過 janny 話驚我 handle 唔到 , 我都知架啦 !!! 所以最後都無試到~~

janny 問我鍾意邊件多 d 時 , 我就話鍾意三件既 mix 版 , 就係水晶袖 , 上身超閃 , 花邊領既 ... 哈哈 , janny 聽到就話幫我 design 一件喎 .... 嘩 ... 真係太好啦 !!!!

之後 janny 仲叫我試下希臘女神系列 , 都好靚架 , 不過唔係我要既款 ...

再試埋 oscar 系列 , 著左一件唔記得左叫咩 , 好似叫 "legenly" 都唔知係唔係咁串 , 一著左上身就真係好鍾意 , 之前試衫影相時 , 從未試過有呢種感覺 , 完全係唔想除返出黎 ... 呢件衫 janny 上次都有介紹過 , 但 o個 時睇覺得 d 花紋唔係咁好 , 所以無揀到 , 但無諗到著左上身係另一回事 ... 不過都係差 d 野 , 其實都唔知差 d 咩架 , 跟住 janny 就話試下加條底裙落去睇下 , 點知加左上去又真係好睇好多喎 !!! janny 叫 iris (全程幫我換衫既人 , 唔該曬 iris !!!) 試下加細鋼紗睇下 , 仲話如果唔好睇就唔使出黎 , 點知加左細鋼紗之後仲要係好睇好好好好好多添 ..... 連佢地加埋 janny 同 iris 都話好靚 ... 不過另一個問題就係我嫌佢地唔夠閃 , janny 就話可以幫我加多 d 水晶上去上半身到 , 至於下身就唔使加 , 因為 d 銀線繡花已經會閃 ....

試完婚紗就緊係試晚裝啦 !!!

1.) 70" 拖尾雪紗黃 : 好靚 , 公主 feel

2.) 貝兒 : 黃色

3.) 雙行水晶 : 紅色 , 著左上身 , 佢地連我自己都話靚

4.) strawberry : 紅色

5.) greenty/green tea (唔知邊個名先係) : 綠色 , 美人魚尾 , 後面有蝴蝶結 , 呢款都幾特別 ....

6.) 水仙子 : 湖水綠漸變色 ....

7.) karen : 紫色 , 黑色 lace 繡花 , 型 .... 因為呢件係新衫 , 仲要未整好 , 而我係第一個客人租佢 , 所以 janny 用左我個名黎做呢件衫既名 , 對我黎講真係超級有意義 , 好開心 ...

8.) 漸變銀灰 : 唔記左叫咩名 , 只係記得係漸變銀灰 ...

9.) 粉紅香檳金 ......

之後就試左兩件天藍色既 , 好鍾意好鍾意 ..... janny 仲話設計多一件天藍色既俾我揀 ... so happy !!!

當我試緊唔知第幾件晚裝既時候 , 佢地齊齊落左去樓下食荔枝 , d 荔枝係 janny 間 workshop 出面種架 , 好新鮮 ...

到我試曬衫之後 , 就係我最痛苦既時候 , 佢地三個每人揀三件佢地覺得我著得最好睇 .... 唉 .. 佢地揀既全部都係我鍾意架 !!!

janny 見我咁頭痛就叫我落去食 d 荔枝先 , d 荔枝真係好味 , 雪凍左都咁甜 , janny 仲俾左一袋我拎走添 ... thank you janny !!!

至於我揀左邊件 ??? 大家就要估下啦 ~~~

走既時候望一望隻錶 , 嘩 ... 原來已經六點鐘啦 , 試左四個鐘衫 ... 哈哈 !!! 佢地問我累唔累 , 點會累呀 !!! 有咁多靚衫著 ~~~~

janny 仲話佢個 workshop 後面仲有棵龍眼樹同埋蘋果芒樹 .... 佢話我地 2nd fitting 時應該仲會有龍眼食喎 !!! 我諗我 mammy 會超級鍾意呢間 workshop 囉 , 因為有齊佢最鍾意食既三款生果樹 ... 哈哈 ~~~

今日真係要好多謝 janny 呀 , 好期待你為我設計既婚紗同晚裝呀 !!!

仲有 iris 不停咁幫我換衫 !!!

當然唔少得既仲有未來老公 , nephy 同埋 jennifer !!!!

快 d 到 2nd fitting 就好啦 ~~~